هريدى مخبر سرى

من طرف **The Ghost** الخميس مارس 05, 2009 9:02 pm

محمدين كان زعلان أوي
وكان عنده مشكلة صعبة .. بس حظه حلو أنه لقى مكتب الأستاذ هريدي المخبر السري ..
دخل على المكتب بسرعة وهو بينهج ..
محمدين : يا ناس يا اللي هنا ..
هريدي راح له وقال له : أنت مين يا بني وعاوز إيه ؟
محمدين : أنا محمدين .. وكنت عاوز هريدي بيه ..
هريدي : أنا هريدي بيه نعمين
محمدين : الله ينعم عليك .. أنت مخبر سري صح ؟ تعرف تجيب لي حاجة ضاعت مني ؟
هريدي : أنت بتهزر يا بني ده أنا هريدي هولمز .. أشهر من شيرلوك هولمز وأجاثا كريتسي..
محمدين: هولز !! مش ده حلويات ؟
هريدي: يا عم خش في الموضوع هو أنا ناقصك ..
محمدين : حاضر .. بص يا سيدي .. أنا صحيت الصبح ودخلت الحمام علشان أغسل وشي وسناني كمان بفرشة الأسنان ..
ببص من شباك الحمام ، وفجأة لقيتها أختفت ..
هريدي : هي إيه اللي أختفت ؟ فرشة الأسنان ؟
محمدين : فرشة أسنان أيه بس .. دي العربية النقل بتاعتي .. كنت راكنها قدام البيت ..
هريدي : طيب كويس .. أوصف لي شكلها ..
محمدين : هي بلاستيك ولونها أحمر وبخط أبيض ..
هريدي : يا راجل أنت هتجنني .. هو فيه عربية بلاستيك ولونها أحمر وبخط أبيض ؟
محمدين : عربية إيه يا بيه دي فرشة الأسنان ..
هريدي : الله يخرب عقلك أنت هتجنني .. سيبك منها دلوقتي ولو ملقتهاش هجيب لك واحدة جديدة ..
محمدين : معقول يا هريدي بيه !! هتجيب لي عربية جديدة ..
هريدي : لا يا خفيف .. هجيب لك فرشة سنان جديدة ..
بعد الوصف والشرح هريدي راح يدور على العربية .. وحظه حلو أن محمدين كان بينقل بيها سمك ، ولأن هريدي ذكي جدا .. عرف الطريقة اللي يدور بيها على العربية .. جاب قطة مدربة وفضل يدور على العربية من ريحتها .. لغاية ما لقاها .. بس لقى واحد شكله هو اللي كان سارقها .. راح نطط عليه و.................
طاخ .. طيخ .. بوووووووووووم .. كراش ........ حاجة ساقعة بيبسي ..
هريدي يا عيني راح القسم .. وهناك عرف الحقيقة المرة ..
الظابط : بتضرب رجل شرطة .. ده أنا حوديك في داهية ..
هريدي : والله مظلوم يا بيه .. ده كنت بدور على عربية محمدين المسروقة ..
الظابط : عربية السمك دي .. لا يا فالح ده الوزير كان هيعدي من الشارع .. والعربية ريحتها تقرف .. قلنا نبعدها عن طريق سيادة الوزير ..
هريدي : ربنا ياخده ويخرب بيته ويحرقه بجاز ..
الظابط : أنت أتجننت بتشتم الوزير .. ده أنت هتروح ورا الشمس ..
هريدي: وزير ايه يا بيه .. أنا بشتم محمدين ..
الظابط : طيب أحنا هنبعتك هناك ..
هريدي : فين ؟ عند محمدين ؟
الظابط : لا يا خفيف .. السجن ..
هريدي : الله يخرب بيته ..
الظابط : مين ؟ محمدين ؟
هريدي : لا .. السجن
وطبعا بعد الموضوع ده .. هريدي أعتزل نهائياَ ومبقاش مخبر سري تاني .. بس تفتكروا عبقري زيه يشتغل ايه ؟؟